Latest News

செய்தி வெளியீடு எண் : 4, நாள் : 06 .01.2018 சேலம் மாநகராட்சி பகுதிகளில் புகையில்லா போகி மற்றும் சுகாதார பொங்கல் கொண்டாடுவதற்கு ஏதுவாக போகி பக்கெட் சேலன்ஞ் இயக்கம் அறிமுகம் மாநகராட்சி ஆணையாளர் திரு.ரெ. சதீஷ் அவர்கள் தகவல்

சேலம் மாநகராட்சி பகுதிகளில் புகையில்லா போகி மற்றும் சுகாதார பொங்கல்  கொண்டாடுவதற்கு ஏதுவாக 10.01.2018 முதல் 20.01.2018 வரை போகி பக்கெட் சேலன்ஞ் இயக்கம் மூலம் விழிப்புணர்வு பணிகள் மேற்கொள்வது தொடர்பான ஆலோசனைக்கூட்டம் 06.01.2018 அன்று மாநகராட்சி மைய அலுவலகத்தில்  மாநகராட்சி ஆணையாளர் தலைமையில் நடைபெற்றது.  சேலம் மாநகராட்சி பகுதிகளில் போகி பண்டிகையினை  முன்னிட்டு, பொது மக்கள் தங்களது வீடுகளிலிருந்து சேகரிக்கப்படும்  பழைய பொருட்களை பெறுவதற்காக மாநகராட்சி நிர்வாகத்தின் சார்பில் ஒவ்வொரு மண்டலத்திற்கும் தலா 25 மையங்கள் என 4 மண்டலங்களில் 100 சிறப்பு மையங்கள் பழைய பொருட்களை சேகரிப்பதற்காக அமைக்கப்பட உள்ளது. பொது மக்கள் தங்கள் வீடுகளில் பயன்படுத்திய பழைய பிளாஸ்டிக்  மற்றும் கோரை பாய்கள் , தலையணைகள், காலனிகள், டயர்கள் போன்ற உபயோகமற்ற பொருட்களை  மாநகராட்சியால் அமைக்கப்பட்டுள்ள உலர்கழிவு சேகரிப்பு மையத்தில் வழங்கிடலாம். மேலும்  மாநகராட்சி பகுதிகளில் செயல்படும் அனைத்து அரசு மற்றும் தனியார் பள்ளிகள்,  கல்லூரிகளில் பயிலும் மாணவ, மாணவியர்கள் தங்கள் வீடுகள் மற்றும் விடுதிகளிலிருந்து சேகரிக்கக் கூடிய  பழைய துணிகள், காலனிகள் போன்றவற்றை சேகரிப்பதற்காக 10.01.2018 முதல் 20.01.2018 வரை அனைத்து பள்ளி, கல்லூரிகளிலும்  அட்டை பெட்டிகள் வைக்கப்படும். பொதுமக்களிடையே புகையில்லா போகி மற்றும் சுகாதார பொங்கல் குறித்த  விழிப்புணர்வு ஏற்படுத்திடும் வகையில், 10.01.2018 முதல் 20.01.2018 வரை நாள்தோறும் பல்வேறு நிகழ்ச்சிகள் மேற்கொள்ளப்படவுள்ளது.  அதனடிப்படையில்  பள்ளி மாணவ, மாணவியர்களைக் கொண்டு விழிப்புணர்வு பேரணிகள் நடத்துதல்,  அனைத்து வீடுகளுக்கும் டிபிசி  பணியாளர்கள், பரப்புரையாளர்கள் மூலம் ஒட்டு வில்லைகள், துண்டு பிரசுரங்கள் வெளியிடுதல் பொதுமக்கள் அதிகம் கூடும் இடங்களில் விழிப்புணர்வு பதாதைகள் அமைத்தல் , வாட்ஸ்அப் குரூப்கள் மூலம் குறுஞ்செய்திகள் அனுப்புதல் மற்றும் தெரு முனை பிரச்சாரங்கள்  போன்ற பல்வேறு நடவடிக்கைகளை தன்னார்வ அமைப்புகள் ஒத்துழைப்போடு  மேற்கொள்ளுவதற்கு மாநகராட்சி நிர்வாகம் நடவடிக்கை எடுத்துள்ளது.   போகி பக்கெட் சேலன்ஞ் இயக்கத்தினை பொதுமக்களின் பங்களிப்போடு செயல்படுத்தி, சேலம் மாநகராட்சி பகுதி வாழ்மக்கள் புகையில்லா போகி மற்றும் சுகாதார பொங்கல்  கொண்டாடுவதற்கு ஏதுவாக, மாநகராட்சி நிர்வாகம் மேற்கொள்ளும் இப்புதிய முயற்சிக்கு பொதுமக்கள் அனைவரும் ஒத்துழைப்பு நல்கிட வேண்டும் என ஆணையாளர் வேண்டுகோள் விடுத்துள்ளார்.    இக்கூட்டத்தில் உதவி ஆணையாளர்கள் திரு.ப. ரமேஷ்பாபு, திரு.ஏ.ஆர்.ஏ. ஜெயராஜ், திரு.மு. கணேசன், திரு.கே.பி. கோவிந்தன், சுகாதார அலுவலர்கள் , சுகாதார ஆய்வாளர்கள், தன்னார்வ தொண்டு அமைப்புகளைச் சார்ந்தவர்கள் மற்றும் பள்ளி நிர்வாகிகள் ஆகியோர் கலந்து கொண்டனர். 

Read More

செய்தி வெளியீடு எண் :01, நாள் : 02.01.2018 தூய்மை இந்தியா திட்டத்தின் கீழ் திடக்கழிவு மேலாண்மை பணிகளை சிறப்பாக மேற்கொள்ளும் குடியிருப்போர் நலச்சங்கங்களை பாராட்டி பரிசுகள் வழங்கப்படும் மாநகராட்சி ஆணையாளர் திரு.ரெ. சதீஷ் அவர்கள் தகவல்

சேலம் மாநகராட்சிக்குட்பட்ட பகுதிகளில் தூய்மை இந்தியா திட்டத்தின் கீழ், திடக்கழிவு மேலாண்மை பணிகளை சிறப்பாக மேற்கொள்ளும் குடியிருப்போர் நலச்சங்கங்களை கண்டறிந்து, அவர்களை பாராட்டி பரிசுகள் வழங்கப்படும் என 02.01.2018 அன்று சூரமங்கலம் மண்டலம் திருமால் நகர் குடியிருப்போர் நலச்சங்க விழாவில் மாநகராட்சி ஆணையாளர் திரு.ரெ. சதீஷ் அவர்கள் தெரிவித்தார்.  சேலம் மாநகர பகுதிகளில் தூய்மை இந்தியா திட்டத்தின் கீழ், பல்வேறு சுகாதார மேம்பாட்டு பணிகள் மேற்கொள்ளப்பட்டு வருகிறது.  குறிப்பாக திடக்கழிவு மேலாண்மை  செயலாக்கம், திறந்த வெளியில் மலம் கழிப்பதை தவிர்த்து, தனி நபர் கழிப்பிடங்கள் கட்டுவதற்கான விழிப்புணர்வு பணிகள் , வீடுகளிலிருந்து சேகரிக்கப்படும் கழிவுகளை தரம் பிரித்து வழங்குவதற்கு தேவையான விழிப்புணர்வு ஏற்படுத்துதல் போன்ற பணிகளுக்கு அதிக முக்கியத்துவம் அளித்து, மாநகராட்சி நிர்வாகம் பல்வேறு நடவடிக்கைகளை மேற்கொண்டு வருகிறது.  அதனடிப்படையில் குடியிருப்போர் நலச்சங்கங்கள் மாநகராட்சி நிர்வாகத்திற்கு ஒத்துழைப்பு வழங்கிட வேண்டும் என்ற வேண்டுகோள் விடுக்கப்பட்டதன் காரணமாக , மாநகர பகுதிகளில் உள்ள பல்வேறு குடியிருப்போர் நலச்சங்கங்கள் தூய்மை இந்தியா திட்ட பணிகளை மேற்கொள்ளுவதற்கு முன்வந்துள்ளன.   சூரமங்கலம் மண்டலத்திற்குட்பட்ட கோட்டம் எண் 3 ல் உள்ள திருமால் நகர் பகுதி குடியிருப்போர் நலச்சங்கம் தாமாகவே  முன்வந்து,  வீடுகளில் சேரிக்கப்படும் கழிவுகளை மக்கும் மற்றும் மக்காத கழிவுகளாக தரம் பிரித்து, இரு வண்ணக் கூடைகளில் வழங்குவதற்கு நடவடிக்கை எடுத்துள்ளது பாராட்டுக்குரியதாகும்.  இப்பகுதியில் உள்ள வீடுகளுக்கு தினந்தோறும் நேரடியாக சென்று, தரம் பிரித்து வழங்கப்படும் கழிவுகளை பெறுவதற்கு, சுகாதார பணியாளர்கள் அறிவுறுத்தப்பட்டுள்ளார்கள். மேலும் இப்பகுதிக்கென மாநகராட்சி நிர்வாகத்தின் சார்பில்  இரண்டடுக்கு மூன்று சக்கர மின்கல மோட்டார் வாகனம் கழிவுகளை சேகரிப்பதற்காக வழங்கப்பட்டுள்ளது.  இப்பகுதியில் சேகரமாகும் மக்கும் தன்மை கொண்ட கழிவுகளை இயற்கையான உரம் தயாரித்திடும் வகையில் உரக்கிடங்குகள் பொதுமக்களின் ஒத்துழைப்போடு அமைப்பதற்கு மாநகராட்சி நிர்வாகத்தால்  நடவடிக்கை எடுக்கப்படும். மேலும் இப்பகுதியில் குடியிருப்போர் நலச்சங்கம் பொதுமக்கள் பாதுகாப்பு நலன் கருதி, கண்காணிப்பு காமிராக்கள் பொருத்தியுள்ளது மிகவும் பாராட்டுக்குரிய நடவடிக்கையாகும். திருமால் நகர் பகுதியில் திடக்கழிவு மேலாண்மை பணிகளை சிறப்பாக மேற்கொண்டு, முன்மாதிரியான பகுதியாக மாற்றுவதற்கான நடவடிக்கைகளுக்கு முழு ஒத்துழைப்பினை மாநகராட்சி நிர்வாகம் குடியிருப்போர் நலச்சங்கத்திற்கு வழங்கிடும்.  மேலும் மாநகர பகதிகளில் உள்ள பிற குடியிருப்போர் நலச்சங்கங்களும் தூய்மை இந்தியா திட்டத்தின் கீழ், திடக்கழிவு மேலாண்மை பணிகளை சிறப்பாக செயல்படுத்திட முன்வர வேண்டும்.  அவ்வாறு சிறப்பாக செயல்படுத்திடும் குடியிருப்போர் நலச்சங்கங்களை பாராட்டி பரிசுகள் வழங்கப்படும் என ஆணையாளர் தெரிவித்தார்.  பின்னர் திருமால் நகரில் உள்ள 125 குடியிருப்புகளுக்கு கழிவுகளை தரம் பிரித்து வழங்குவதற்கு ஏதுவாக, பச்சை மற்றும் நீல நிற கூடைகளை மாநகராட்சி ஆணையாளர் வழங்கினார்.   இந்நிகழ்ச்சியில் செயற்பொறியாளர் திரு.ஜி. காமராஜ், உதவி ஆணையாளர் திரு. ப. ரமேஷ்பாபு, மாநகர நல அலுவலர் மரு.வி. பிரபாகரன், சுகாதார அலுவலர்கள், திரு.எஸ். மணிகண்டன் திரு.கே. ரவிச்சந்திரன், திருமால் நகர் குடியிருப்போர் நலச்சங்க தலைவர்  திரு.எஸ். குப்புசாமி, செயலாளர் திரு.பி. பாபு, பொருளாளர் திரு.சி. சுந்தரம் உள்பட பலர் கலந்து கொண்டனர்.   

Read More